Душанбе, 22-юми октябри соли 2018
Рӯзҳои 19-20-уми октябри соли 2018 дар шаҳри Душанбе ҳафтумин Конфренсияи байналмилалии солонаи Ассотсиатсияи авруосиёии арзёбии сифати таҳсилот (АААСТ) таҳти унвони “Арзёбии сифати таҳсилот дар зинаҳои гуногуни он” баргузор гардид. Конфeрeнсияи мазкур муштаракан бо Маркази миллии тестии назди Президенти Ҷумҳурии Тоҷикистон бо дастгирии Барномаи Россия барои мусоидат дар соҳаи маориф бо мақсади рушд (Russia Education Aid for Development), ки аз ҷониби Бонки ҷаҳонӣ роҳандозӣ мегардад ва Институти “Ҷамъияти Кушода”- Бунёди Мадад дар Тоҷикистон гузаронида шуд. Макони баргузорӣ меҳмонхонаи бошукӯҳи «Хилтон» (собиқ “Шератон”) буд.
Кори конференсия аз ҷаласаи умумӣ ва бахшҳо (сексияҳо)-и дигар бо иштироки созмонҳои бонуфузи байналмилалӣ, институтҳои рушди таҳсилот ва агентиҳои арзёбии сифати таҳсилот, коршиносон ва муҳаққиқон дар соҳаи арзёбии сифати таҳсилот аз Федератсияи Россия ва 11 кишвари ИДМ ва хориҷи дур 2 рӯз бомаҳсул идома ёфт.
Мавзӯи маърӯзаҳо мустақиман ба мавзӯи конфренсия – “Арзёбии сифати таҳсилот дар зинаҳои гуногуни он” рабт дошт, ки ин барои татбиқи ҳадафи асосии АААСТ – таъмини фазою заминаи ягона ҷиҳати баррасии масъалаҳо, мубодилаи афкор, ҳамкориҳои судманду самарабахш дар байни шарикони соҳа, муҳаққиқону коршиносон – иштирокдорони конфренсия мусоидат хоҳад кард.
Дар конференсияи мазкур мавзӯъҳое, аз ҷумлаи имтиҳонҳои марказонидаи дохилшавӣ ҳамчун абзори ҳалли масъалаҳои давлатию ҷамъиятӣ, арзёбии сифат дар зинаҳои гуногуни таҳсилот (ибтидоӣ, миёнаи умумӣ ва миёнаю олии касбӣ), омилҳои таъминсозандаи ягонагии арзёбии сифати таҳсилот, аҳаммияти таъмини ин ягонагӣ, салоҳиятҳои омӯзгорон дар арзёбии донишу маҳорат, аҳаммияти омодагии рақобатпазирии мутахассисон дар заминаи фалсафаи таҳсилот дар асри XXI ва амсоли инҳо мавриди баррасӣ қарор гирифтанд.
Кори конференсия аз якчанд бахшҳо иборат буд ва яке аз ҷаласаҳои он дар шакли мизи мудаввар ба мавзӯи “Фаъолияти Маркази миллии тестии назди Президенти Ҷумҳурии Тоҷикистон: комёбиҳои асосӣ ва нақши Марказ дар арзёбии сифати таҳсилот” бахшида шуда буд.
