Душанбе, 3-юми ноябри соли 2023
Конститутсияи Ҷумҳурии Тоҷикистон санади муқаддасу сарнавиштсозест, ки истиқлоли давлатии тоҷиконро ба расмият дароварда, аркони сиёсиву ҳуқуқӣ ва самтҳои асосии рушди давлату ҷамъиятро бо меъёрҳои ҳуқуқӣ дақиқу муайян кард. Ин бахтномаи миллат шаҳодатномаи давлати соҳибистиқлоли мост, ки ба шарофати он аҳли башар Тоҷикистонро чун як ҷузъи комилҳуқуқи ҷомеаи ҷаҳонӣ ва тоҷиконро чун мардуми мутамаддину бунёдкор шинохтаанд. Конститутсияи Ҷумҳурии Тоҷикистон 6-уми ноябри соли 1994 аз тариқи раъйпурсии умумихалқӣ қабул гардида, ин рӯз ҳар сол ҳамчун Рӯзи Конститутсияи мамлакат ҷашн гирифта мешавад.
Ба муносибати ин рӯзи таърихӣ – Рӯзи Конститутсияи Ҷумҳурии Тоҷикистон 3-юми ноябри соли 2023 дар маҷлисгоҳи Маркази миллии тестии назди Президенти Ҷумҳурии Тоҷикистон ҷаласаи идона баргузор шуд.
Ҷаласа бо сухани муқаддамотии директори Марказ Ҷаъфарзода Сабзалӣ оғоз гардид. Мазкур, аз ҷумла қайд кард, ки қабули Конститутсияи Тоҷикистон яке аз дастовардҳои намоёни таърихӣ дар замони истиқлоли давлатист. Конститутсия дар масири бунёд ва рушди давлати навини тоҷикон нақши хеле муҳимро дорост.
Конститутсияи Ҷумҳурии Тоҷикистон барои таъсису рушди низоми ҳуқуқии мамлакат, сохтору мақомоти давлатӣ ва дар меҳвари кори онҳо қарор додани инсон ва ҳуқуқу озодиҳои ӯ асос гузошта, таъмини озодӣ, адолати иҷтимоӣ ва баробарҳуқуқии ҷомеаи навини Тоҷикистонро кафолат медиҳад, – гуфт Ҷаъфарзода С.Ф.
Директори Марказ Ҷаъфарзода С.Ф вазифаи ҷонии ҳар як шаҳрванд будани арҷгузорию эҳтиром ва риояи бечунучарои Конститутсияи ҷумҳуриро таъкид карда, дар хотимаи сухан ҳозиринро ба муносибати иди бузурги давлатӣ – Рӯзи Конститутсияи Ҷумҳурии Тоҷикистон муборакбод гуфт.
Баъдан аз таърихи Конститутсия дар ҷумҳурӣ ва пиромуни аҳаммияту нақши Конститутсия мутахассиси фанни таърихи Марказ Зарифов Н. барои аҳли маҷлис маъруза кард. Дар атрофи мавзуъ якчанд аз аҳли маҷлис музокира ва изҳори ақида намуданд.
Дар бахши дувуми ҷаласа чанде аз кормандон бо мукофотҳои соҳавӣ – нишони “Аълочии маорифи Ҷумҳурии Тоҷикистон” ва ифтихорномаҳо, ки аз ҷониби Вазорати маориф ва илми Ҷумҳурии Тоҷикистон тақдим гардида буд, арҷгузорӣ шуданд.
Дар ин ҷаласа, ҳамчунин ба 2 нафар корманд шаҳодатномаи узвият ба Ҳизби халқии демократии Тоҷикистон супорида шуд.
