Душанбе, 25-уми апрели соли 2022
Аз 18 то 21 апрели соли 2022 бо мақсади арзёбии муассисаҳои таълимии таҳсилоти миёнаи умумӣ барои ташкили марказҳои имтиҳонӣ ҷиҳати баргузории имтиҳонҳои марказонидаи дохилшавӣ дар соли 2022 аъзои гурӯҳи корӣ бо роҳбарии директори Маркази миллии тестии назди Президенти Ҷумҳурии Тоҷикистон Ҷаъфарзода Сабзалӣ дар вилояти Суғд қарор доштанд.
Дар ҷараёни арзёбии муассисаҳои таълимӣ барои ташкили марказҳои имтиҳонӣ гурӯҳи кориро сардори раёсати маорифи вилояти Суғд Набизода М., мудири маорифи шаҳри Конибодом Ҷабборӣ А., мудири маорифи ноҳияи Бобоҷон Ғафуров Бобоева Н., мудири маорифи шаҳри Хуҷанд Акмалхоҷаева М. ва сардори раёсати маорифи шаҳри Истаравшан Пулотова М. ҳамроҳӣ намуданд.
Бояд гуфт, дар 5 шаҳру ноҳияи вилоят 13 муассисаи таълимӣ барои ташкили марказҳои имтиҳонӣ ба нақша гирифта шудааст, ки аз онҳо 5 –тояш бо мақсади ташкили марказҳои имтиҳонии эҳтиётӣ аст.
Муассисаҳои таълимие, ки барои ташкили марказҳои имтиҳонӣ дар заминаи онҳо арзёбӣ гардиданд, дорои шароити хуб ва ҷавобгӯ ба талабот барои баргузории имтиҳонҳо мебошанд.
