Душанбе, 23-юми феврали соли 2024
23-юми феврали соли 2024 дар дафтари ососии Маркази миллии тестии назди Президенти Ҷумҳурии Тоҷикистон (Марказ) бо мақсади сазовор таҷлил намудани 31-солагии таъсисёбии Қувваҳои Мусаллаҳи Ҷумҳурии Тоҷикистон бо иштироки кормандони дафтари асосии Марказ ва кормандони бахшҳои минтақавӣ (ба таври онлайн) маҷлиси идона доир шуд.
Ҷаласаро Сабзалӣ Ҷаъфарзода, директори Марказ, оғоз намуда, кормандонро ба ифтихори 31-умин солгарди таъсисёбии Қувваҳои Мусаллаҳи Ҷумҳурии Тоҷикистон шодбош кард.
Директори Марказ, аз ҷумла зикр намуд, ки Қувваҳои Мусаллаҳи кишвар дар вазъияти ниҳоят мураккаби мамлакат таъсис ёфта, дар муддати 31 сол он аз лиҳози тактикию техникӣ ба артиши пурқувват ва мукаммал табдил шуд.
– Агар мо ба таърихи сипаригардидаи меҳан назар намоем, пеш аз ҳама дар таъсиси Қувваҳои Мусаллаҳи Ҷумҳурии Тоҷикистон саҳми бузургу беназири Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пеши назар меояд. Роҳбари давлат ҳанӯз аз замони таъйинашон ба вазифаи Раиси Шурои Олӣ барои оромиву осудагии кишвар дар фикри таъсиси Артиши миллӣ буданд. Ин буд, ки 18 уми декабри соли 1992 аз ҷониби Раиси Шурои Олии Ҷумҳурии Тоҷикистон муҳтарам Эмомалӣ Раҳмон қарор “Дар бораи таъсиси Қувваҳои Мусаллаҳи Ҷумҳурии Тоҷикистон” ба имзо расид ва 23-юми феврали соли 1993 аввалин гашти ҳарбӣ дар майдони “Дӯстӣ”-и шаҳри Душанбе баргузор шуд. Баъди аввалин гашти низомӣ ин ҷашни пурифтихор мақоми расмӣ гирифт,-дар идомаи суханронӣ зикр дошт, Сабзалӣ Ҷаъфарзода, директори Марказ.
Ҳамчунин дар баромади худ директори Марказ гуфт, ки ҳоло ҳазорҳо ҷавони бонангу номуси Тоҷикистон ба саффи Қувваҳои Мусаллаҳи Ҷумҳурии Тоҷикистон пайвастаанд, ки бо бедорхобӣ ва ҷасорату ҷавонмардияшон дар ҳифзи сарҳади давлатӣ ва таъмини амнияти шаҳрвандон нақши муҳим доранд.
Дар идомаи чорабинӣ вобаста ба нақши сарбозону афсарон дар ҳифзи марзу буми кишвар ва якпорчагии ин меҳани аҷдодӣ, инчунин 31-солагии таъсиси Артиши миллӣ маъруза ироа шуд.
