Душанбе, 23-юми феврали соли 2026
23-юми феврали соли 2026 дар дафтари асосии Маркази миллии тестии назди Президенти Ҷумҳурии Тоҷикистон ба муносибати иди Рӯзи Қувваҳои Мусаллаҳи Ҷумҳурии Тоҷикистон бо иштироки роҳбарият ва кормандони Марказ ҷаласаи тантанавӣ баргузор гардид.
Дар оғози ҷаласа директори Марказ Ҷаъфарзода Сабзалӣ Файзалӣ ҳамаи кормандони Марказро ба муносибати иди Рӯзи Қувваҳои Мусаллаҳи Ҷумҳурии Тоҷикистон табрик намуда, иброз дошт, ки аз таъсиси Артиши миллии Ҷумҳурии Тоҷикистон 33 сол гузашт ва имрӯз сокинони мамлакат дар симои Қувваҳои Мусаллаҳи Ҷумҳурии Тоҷикистон муҳофизи худро мебинанд ва онро сипари боэътимоди Ватан медонанд.
Ҳифзи Ватан яке аз вазифаҳои муқаддаси ҳар як инсон аст. Ниёгони барӯманди мо низ ин ҷузъи ҳувияти миллиро ҳамеша тарғиб мекарданд ва барои озодӣ ва ҳифзи истиқлоли давлатии хеш ҷони худро дареғ намедоштанд. Нишонаи ҷавонмардию ҳимоягарӣ аз ниёгон ба мо мерос буда, муқаддас будани Ватанро гузаштагони мо аз хурдсолӣ ба мо омӯзонидаанд ва он дар хуни мо ҷорист. Ин рисолати муқаддасро мову шумо, ҳамчун насли бузургсол, ҳамчун омӯзгор ва корманди соҳаи маориф, ҳамчун падару модар, ҳамчун масъули соҳаи таълиму тарбия бояд ҳамеша ба ҷавонон талқин созем, – таъкид кард директори Марказ Ҷаъфарзода Сабзалӣ Файзалӣ.
Сипас як қатор кормандони Марказ ба муносибати иди Рӯзи Қувваҳои Мусаллаҳи Ҷумҳурии Тоҷикистон суханронӣ карданд.
Зикр гардид, ҳамасола 23-юми феврал дар Тоҷикистон ин рӯзро бо эҳтиром ва ифтихор ҷашн мегиранд, зеро нерӯҳои мусаллаҳи кишвар амният ва суботи давлатро таъмин менамоянд. Лозим ба тазаккур аст, ки 23-юми феврали соли 1993 нахустин паради ҳарбии Артиши миллӣ баргузор гардид ва ин рӯз расман санаи таъсисёбии қувваҳои мусаллаҳи Тоҷикистон эълон карда шуд. Артиши миллии Ҷумҳурии Тоҷикистон ҳамчун сипари боэътимоди давлатдорӣ ва рамзи истиқлолият дар таърихи навини кишвар мавқеи хос дорад.
Тавре ки Асосгузори сулҳу ваҳдати миллӣ – Пешвои миллат Президенти Ҷумҳурии Тоҷикистон муҳтарам Эмомалӣ Раҳмон таъкид мекунанд: “Адои хизмат дар сафи Артиши миллӣ на танҳо қарзи муқаддаси фарзандӣ, балки мояи ифтихор ва шарафи бузург буда, хизмати ҳарбӣ ба ҳар як ҷавонмард ҳамчун мактаби ҷасорату матонат, дӯстиву рафоқат, худогоҳиву меҳанпарастӣ аст”.
Дар тули 33 сол Артиши миллии Ҷумҳурии Тоҷикистон ба мактаби тарбияи ватандӯстиву ватандорӣ ва меҳанпарастиву мардонагӣ табдил ёфта, то имрӯз дар сафҳои худ даҳҳо ҳазор ҷавони обутобёфтаро ба камол расонидааст. Ҳайати шахсии Қувваҳои Мусаллаҳи кишвар рисолати муқаддаси худ – ҳимояи амнияти давлати соҳибистиқлол ва зиндагии орому осоиштаи мардуми Тоҷикистонро бо устувориву фидокорӣ иҷро карда истодааст.
