Душанбе, 21-уми феврали соли 2025
21-уми феврали соли 2025 дар дафтари асосии Маркази миллии тестии назди Президенти Ҷумҳурии Тоҷикистон ба муносибати иди Рӯзи Қувваҳои Мусаллаҳи Ҷумҳурии Тоҷикистон ҷаласаи тантанавӣ баргузор гардид.
Ҷаласаро директори Марказ Ҷаъфарзода Сабзалӣ Файзалӣ кушода, кормандони Марказро ба муносибати иди Рӯзи Қувваҳои Мусаллаҳи Ҷумҳурии Тоҷикистон табрик намуда, иброз дошт, ки аз таъсиси Артиши миллии Ҷумҳурии Тоҷикистон 32 сол гузашт ва имрӯз сокинони мамлакат дар симои Қувваҳои Мусаллаҳи Ҷумҳурии Тоҷикистон муҳофизи худро мебинанд ва онро сипари боэътимоди Ватан медонанд.
Ҷумҳурии Тоҷикистон дорои Артиши миллии худ аст ва ҳамасола дар саросари мамлакат 23-юми феврал Рӯзи Қувваҳои Мусаллаҳи Ҷумҳурии Тоҷикистон ҷашн гирифта мешавад. Ин артиш ва ҷузъу томҳои Қувваҳои Мусаллаҳи Ҷумҳурии Тоҷикистон аз ҷойе тайёр ба мо дастрас нагардидааст. Қувваҳои Мусаллаҳи Ҷумҳурии Тоҷикистон зодаи даврони истиқлол аст ва дар шароити бисёр вазнин таъсис ёфтааст.
18-уми декабри соли 1992 Раиси Шӯрои Олии Ҷумҳурии Тоҷикистон муҳтарам Эмомалӣ Раҳмон «Дар бораи таъсиси Қувваҳои Мусаллаҳи Ҷумҳурии Тоҷикистон» қарор ба имзо расонд ва Артиши миллӣ таъсис дода шуд. 23-юми феврали соли 1993 нахустин паради ҳарбии Артиши миллӣ баргузор гардид, ки он рӯз расман санаи таъсисёбии Қувваҳои Мусаллаҳи Ҷумҳурии Тоҷикистон эълон карда шуд.
Ҳифзи Ватан яке аз вазифаҳои муқаддаси ҳар як инсон аст. Ниёгони барӯманди мо низ ин ҷузъи ҳувияти миллиро ҳамеша тарғиб мекарданд ва барои озодӣ ва ҳифзи истиқлоли давлатии хеш ҷони худро дареғ намедоштанд. Нишонаи ҷавонмардию ҳимоягарӣ аз ниёгон ба мо мерос буда, муқаддас будани Ватанро гузаштагони мо аз хурдсолӣ ба мо омӯзонидаанд ва он дар хуни мо ҷорист. Ин рисолати муқаддасро мову шумо, ҳамчун насли бузургсол, ҳамчун омӯзгор ва корманди соҳаи маориф, ҳамчун падару модар, ҳамчун масъули соҳаи таълиму тарбия бояд ҳамеша ба ҷавонон талқин созем, – таъкид кард директори Марказ Ҷаъфарзода Сабзалӣ Файзалӣ.
Ҳамзамон таъкид намуд, ки вазифаи мову шумо ин аст, ки бо руҳияи бузурги ватандӯстӣ, софдилона уҳдадориҳои давлатию ҷамъиятии худро иҷро кунем насли наврасу ҷавонро ҳамчун ватандӯсти асил ба воя расонем ва бо шукронаи Истиқлол ва шукронаи ин хонаи обод дар рушди Ватани азизамон саҳмгузор бошем.
Сипас як қатор кормандони Марказ низ ба муносибати 32-юмин солгарди таъсисёбии Қувваҳои Мусаллаҳи Ҷумҳурии Тоҷикистон суханронӣ карданд.
Зикр гардид, ки бунёду таъсиси Артиши миллӣ ва Қувваҳои Мусаллаҳи мамлакат ҳамагӣ баъди якуним соли ба даст овардани истиқлоли давлатӣ – дар марҳалаи хеле муташанниҷу ҳассоси таърихӣ сурат гирифт. Ин замоне буд, ки бақои давлати мустақили тоҷикон таҳти хатари ҷиддӣ қарор дошт.
Директори Марказ Ҷаъфарзода Сабзалӣ Файзалӣ ба муборакбодии ҳамкорон барояшон саломатӣ, рӯзгори босаодат, осмони соф, хушбахтии оилавӣ ва барору комёбиҳо таманно кард.
