Душанбе, 11-уми феврали соли 2025
Бо ташаббуси Маркази миллии PISA-и Маркази миллии тестии назди Президенти Ҷумҳурии Тоҷикистон аз 13-уми январ то 7-уми феврали соли 2025 дар дафтари асосии Маркази миллии тестӣ бо иштироки директорон ва муовинони директорони 170 муассисаи таълимии шаҳри Душанбе, омӯзгорони фанҳои забони тоҷикӣ, забони русӣ, математика, физика, химия ва биология семинари омӯзишӣ баргузор гардид.
Тазаккур бояд дод, ки мувофиқи созишномае, ки Вазорати маориф ва илми Ҷумҳурии Тоҷикистон бо Созмони ҳамкории иқтисодӣ ва рушд (СҲИР) ба имзо расонидааст, Ҷумҳурии Тоҷикистон бори аввал дар Барномаи байналмилалии арзёбии хонандагон – PISA (Programme for International Student Assessment) иштирок мекунад. Бо пешниҳоди Вазорати маориф ва илми Ҷумҳурии Тоҷикистон ва дар мувофиқа бо Ҳукумати мамлакат Маркази миллии тестии назди Президенти Ҷумҳурии Тоҷикистон масъули гузаронидани ин таҳқиқот таъйин шудааст. Вобаста ба ин дар назди Маркази миллии тестии назди Президенти Ҷумҳурии Тоҷикистон Маркази миллии PISA таъсис дода шуд.
PISA таҳқиқоти байналмилалии муқоисавии сифати таҳсилоти умумӣ буда, дар доираи он дониш ва малакаю маҳоратҳои хонандагони 15-солаи муассисаҳои таълимии кишварҳои гуногун дар се самт – саводи хондан, саводи математикӣ ва саводи илмҳои табиатшиносӣ (физика, химия ва биология) арзёбӣ карда мешавад. Мақсади асосии таҳқиқот арзёбии саводи амалкардӣ (функсионалӣ)-и мактаббачагон ва қобилияти дар амал истифода намудани дониш аст. Таҳқиқот даврӣ буда, ҳар чор сол як маротиба аз тарафи Созмони ҳамкории иқтисодӣ ва рушд баргузор мегардад.
Иштирок дар PISA 2025 имкон медиҳад, ки мо дар муқоиса бо низоми таҳсилоти умумии кишварҳои гуногун самаранокии қарорҳои стратегии қабулшударо дар соҳаи маориф арзёбӣ кунем.
