Душанбе, 1-уми майи соли 2018
30-юми апрели соли 2018 марҳалаи асосии бақайдгирии довталабон барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ (ИМД) дар соли 2018 анҷом ёфт. Инчунин, дар ин рӯз марҳалаи асосии азнавбақайдгирии довталабони худро қаблан номнавискарда ба охир расид. Хотиррасон мекунем, ки соли ҷорӣ ба воситаи низоми ИМД қабули донишҷӯён ба 34 муассисаи таълимии таҳсилоти олии касбӣ ва 47 муассисаи таълимии таҳсилоти миёнаи касбӣ (бо фарогирии 36 гурӯҳи мақсаднок ва 1 шуъба) ба роҳ монда мешавад. Мувофиқи нақшаи қабули донишҷӯён дар соли ҷорӣ 67844 ҷой ҷудо гардидааст, ки аз он 46957 ҷой барои донишгоҳу донишкадаҳо ва 20887 ҷой барои коллеҷҳо аст.
Тибқи тартиби муқаррарнамудаи Ҳукумати Ҷумҳурии Тоҷикистон барои шахсоне, ки дар бақайдгирӣ (марҳалаи асосӣ) барои иштирок дар ИМД сабти ном карда натавонистаанд, марҳалаи иловагии бақайдгирӣ гузаронида мешавад. Ҳамчунин, мувофиқи тартиби мазкур, азнавбақайдгирии довталабоне, ки дар бақайдгирӣ (марҳалаи асосӣ) номнавис шудаанд, дар ду марҳала – асосӣ ва иловагӣ гузаронида мешавад. Бинобар ин, тибқи нақша аз 12-ум то 30-юми июн марҳалаи иловагии бақайдгирии шахсоне, ки дар давраи аз 1-уми март то 30-юми апрел худро номнавис карда натавонистаанд, сурат мегирад. Инчунин аз 12-ум то 20-уми июн марҳалаи иловагии азнавбақайдгирии довталабоне, ки аз 1-уми март то 30-юми апрел номнавис шудаанду хоҳиши иваз кардани интихобҳои аввалияи худро доранд, ба роҳ монда мешавад. Марҳалаҳои иловагии бақайдгирӣ ва азнавбақайдгирӣ танҳо дар нуқтаҳои бақайдгирии шаҳри Душанбе баргузор карда мешавад. Ёдовар мешавем, ки дар марҳалаи иловагии азнавбақайдгирӣ довталаб маблағи хизматрасониро барои иштирок дар ИМД бояд пурра, яъне 250 сомонӣ пардохт кунад. Аз ин лиҳоз, ба шахсоне, ки дар марҳалаи иловагии бақайдгирӣ ё азнавбақайдгирӣ худро номнавис кардан мехоҳанд, тавсия медиҳем, ки дар муҳлатҳои муқарраршуда бо пешниҳоди ҳуҷҷатҳои зарурӣ ба нуқтаҳои бақайдгирии дахлдор дар шаҳри Душанбе муроҷиат намоянд.
Эълон дар сомонаи Марказ бо маълумоти муфассал дар бораи марҳалаҳои иловагии бақайдгирӣ ва азнавбақайдгирӣ дар аввали моҳи июн ҷой дода хоҳад шуд.
