Душанбе, 23-юми октябри соли 2024
Семинари омӯзишӣ дар мавзуи “Гузариш аз зинаи таҳсилоти ибтидоӣ ба таҳсилоти умумии асосӣ”, ки аз 21-ум то 23-юми октябри соли ҷорӣ дар Китобхонаи миллии Ҷумҳурии Тоҷикистон ҷараён дошт, имрӯз ҷамъбаст гардид.
Дар семинар намояндагони Маркази миллии тестии назди Президенти Ҷумҳурии Тоҷикистон, мутахассисони пуртаҷрибаи соҳаи маорифи Федератсияи Русия, намояндагони Сарраёсати маорифи шаҳри Душанбе, шуъбаҳои маорифи чор ноҳияи пойтахт ва мутахассисону омӯзгорони синфҳои ибтидоӣ аз мактабҳои интихобшудаи шаҳри Душанбе иштирок доштанд.
Мақсад аз баргузории семинар фаҳмондани абзори арзёбии салоҳиятҳои омӯзишию фаннӣ, ки дараҷаи донишу малакаҳои хонандагонро аз фанҳои таълимии “Математика” ва “Забони русӣ” инъикос мекунад, инчунин модулҳои таҳсилии гузаришӣ барои синфи 5-ум буд. Абзор ва модулҳои мазкур аз ҷониби коршиносони CICED таҳия гардидааст.
Маркази миллии тестии назди Президенти Ҷумҳурии Тоҷикистон бо CICED ҳамкории зич дошта, бо дастгирии он барномаҳои гуногунро дар самти арзёбии дастовардҳои таълимии хонандагон роҳандозӣ мекунад.
Дар рӯзи охир аз ҷониби масъулин ба иштирокдорони семинар барои иштироки фаъолона, табодули таҷрибаву густариши ҳамкориҳо дар ин самт ва татбиқи барномаи мазкур сертификат такдим карда шуд.
