18-уми апрели соли 2022

18-уми апрели соли 2022 дар “Кохи Суруш” шаҳри Душанбе маросими ҷамъбасти даври ҷумҳуриявии олимпиадаҳои фаннӣ аз фанҳои ҷамъиятӣ-гуманитарӣ ва олимпиада аз фанни технологияи иттилоотӣ ба номи Ал-Хоразмӣ баргузор гардид.

Ёдовар мешавем, ки аз 14-уми то 18-уми апрели соли ҷорӣ дар мактаби байналмилалии президентии шаҳри Душанбе дар асоси фармоиши вазири маориф ва илми Ҷумҳурии Тоҷикистон аз 11-уми апрели соли 2022, № 452 даври ҷумҳуриявии олимпиада аз фанҳои забон ва адабиёти тоҷик, ҳуқуқ, таърих, забони русӣ, забони англисӣ, забони давлатӣ, забон ва адабиёти рус ва инчунин, дар Маркази технологияҳои иттилоотию коммуникатсионии назди сарраёсати маорифи шаҳри Душанбе аз фанни технологияи иттилоотӣ ба номи Ал-Хоразмӣ  барои синфҳои 11 дар ҳамкорӣ бо Маркази миллии тестии назди Президенти Ҷумҳурии Тоҷикистон гашта буд.

Дар олимпиадаҳои мазкур 778 нафар хонанда, аз ҷумла аз мактабҳои таҳсилоти умумӣ 428 хонанда ва аз мактабҳои навъи нав (мактабҳои президентӣ, литсей ва гимназияҳо) 350 хонанда  иштирок намуданд. Аз 778 иштирокдори олимпиадаҳои фаннӣ 296 хонанда соҳиби ҷойҳои ифтихорӣ (45 медали тилло, 86 медали нуқра, 165 медали биринҷӣ) гардиданд.

Дар олимпиада аз фанҳои ҷамъиятӣ-гуманитарӣ ва олимпиада аз  фанни технологияи иттилоотӣ ба номи Ал-Хоразмӣ хонандагони шаҳри Душанбе бо 116 ҷойи ифтихорӣ (23 ҷойи якум, 26 ҷойи дуюм, 67 ҷойи сеюм) сазовори мақоми якум, вилояти Суғд бо 75 ҷойи ифтихорӣ (8 ҷойи якум, 23 ҷойи дуюм, 44 ҷойи сеюм) сазовори мақоми дуюм, вилояти Хатлон 67 ҷойи ифтихорӣ (9 ҷойи якум, 26 ҷойи дуюм, 32 ҷойи сеюм) сазовори мақоми сеюм гардида, шаҳру ноҳияҳои тобеи ҷумҳурӣ 22 ҷойи ифтихорӣ (3 ҷойи якум, 5 ҷойи дуюм, 14 ҷойи сеюм) ва Вилояти Мухтори Кӯҳистони Бадахшон 16 ҷойи ифтихорӣ  (2 ҷойи якум, 6 ҷойи дуюм, 8 ҷойи сеюм)-ро соҳиб гардиданд.

Мавриди ёдоварист, ки Маркази миллии тестии назди Президенти Ҷумҳурии Тоҷикистон 2-юми апрел соли 2022 даври ҷумҳуриявии олимпиадаҳои фанниро барои хонандагони синфи 11-и муассисаҳои таълимии таҳсилоти миёнаи умумӣ аз фанҳои табиӣ-риёзӣ баргузор карда буд. 536 нафар хонанда, аз ҷумла аз мактабҳои навъи муқаррарӣ 296 хонанда ва аз мактабҳои навъи нав (мактабҳои президентӣ, литсей ва гимназияҳо) 240 хонанда иштирок намуданд.

Дар маҷмуъ дар олимпиадаҳо аз фанҳои табиӣ-риёзӣ ва олимпиадаҳо аз фанҳои ҷамъиятӣ - гуманитарӣ барои синфҳои 11 дар соли 2022 1311 нафар хонанда, аз ҷумла аз мактабҳои таҳсилоти умумӣ 719 (54,8%) хонанда ва 592 (45,1%) хонанда аз мактабҳои навъи нав (мактабҳои президентӣ, литсей ва гимназияҳо) иштирок намуданд. Аз 1311 иштирокдори олимпиадаҳои фаннӣ 488 (37,2%) хонанда соҳиби ҷойҳои ифтихорӣ 73 (14,9%) медали тилло, 138 (28,2%) - медали нуқра, 277 (56,8%) медали биринҷӣ гардиданд.

Лозим ба зикр аст, ки тибқи тартиби муқарраргардида ба хонандагоне, ки дар даври ҷумҳуриявии олимпиадаҳои фаннӣ ғолиб меоянд, дар доираи имтиҳонҳои марказонидаи дохилшавӣ (дар сурати мувофиқати фанни олимпиада ба ихтисосҳои интихобкардааш) имтиёз дода мешавад. Барои ғолибони ҷойи якум 100 бал, барои ғолибони ҷойи дуюм 75 бал ва барои ғолибони ҷойи сеюм 50 бали бонусӣ муқаррар гардидааст, ки дар имтиҳонҳои марказонидаи дохилшавӣ ба балҳои бадастовардаашон илова мегардад.