Душанбе, 4-уми ноябри соли 2022
4-уми ноябри соли 2022 дар маҷлисгоҳи дафтари асосии Маркази миллии тестии назди Президенти Ҷумҳурии Тоҷикистон бо иштироки директори Марказ муҳтарам Ҷаъфарзода Сабзалӣ Файзалӣ, муовини якуми директор, воҳидҳои сохторӣ ва дигар кормандони Марказ ба муносибати Рӯзи Конститутсияи Ҷумҳурии Тоҷикистон ҷаласаи тантанавӣ баргузор гардид.
Ҷаласа бо суханронии директори Марказ муҳтарам Ҷаъфарзода Сабзалӣ Файзалӣ оғоз гардид. Ҷаъфарзода С.Ф. қайд намуд, ки бо қабули Конститутсияи Ҷумҳурии Тоҷикистон муносибатҳои муҳими давлатию ҷамъиятӣ танзими ҳуқуқии худро ёфта, барои таҳия ва қабули қонунҳо ва санадҳои меъёрию ҳуқуқии дигари давлати соҳибихтиёр заминаи воқеӣ гузошта шуд. Ҳамчунин, зикр гардид, ки Конститутсия дар Ҷумҳурии Тоҷикистон имконият фароҳам овард, ки дар муддати хеле кӯтоҳ дар соҳаҳои гуногуни кишвар халқ ва давлат ба дастоварду комёбиҳои назаррас ноил гарданд. Ҷумҳурии Тоҷикистон бо такя ба мероси фарҳангӣ ва маънавии миллат ба кишваре табдил ёфт, ки дар он ҳувияти миллӣ боло рафт ва мардуми шарафманди он аз захираи маънавии хеш баҳра гирифта, давлати худро побарҷо ва устувортар гардонид.
Дар идома маърузаи Зарифов Н.Ҳ. – сармутахассиси фанни таърихи Марказ дар мавзуи “Конститутсия ва нақши он дар таҳкими истиқлоли давлатӣ" ироа гардид. Номбурда таъкид намуд, Конститутсияи Ҷумҳурии Тоҷикистон, ки дар шароити мураккаби сиёсӣ қабул гардид, аҳаммияти муттаҳидсозиро иҷро кард. Маҳз қувваҳои солимандеши кишвар бо такя ба Конститутсия сулҳи тоҷиконро эҷод намуданд. Аҳаммияти дигари Конститутсия дар он буд, ки он истиқлолияти кишварро аз лиҳози ҳуқуқӣ ба расмият даровард.
Ҳамзамон маърузаи Салоҳиддинова С. – сармутахассиси фанҳои ҳуқуқи инсон ва асосҳои давлат ва ҳуқуқ шунида шуд. Номбурда қайд кард, ки тибқи Конститутсия Тоҷикистон давлати соҳибихтиёр, ҳуқуқбунёд, дунявӣ ва ягона буда, ҳамчун давлати иҷтимоӣ, барои ҳар як инсон шароити зиндагии арзанда ва инкишофи озодонаро фароҳам меорад. Инчунин, инсон, ҳуқуқ, ҳаёт, қадр, номус ва озодиҳои ӯ арзиши олӣ эътироф гардида, дахлнопазир эълон карда шуданд.
Дар фарҷоми ҷаласа чанде аз кормандони Марказ низ ба муносибати Рӯзи Конститутсияи Ҷумҳурии Тоҷикистон суханронӣ намуданд.
