8-уми сентябри соли 2022
8-уми сентябри соли 2022 дар толори дафтари асосии Маркази миллии тестии назди Президенти Ҷумҳурии Тоҷикистон бо иштироки директори Марказ муҳтарам Ҷаъфарзода Сабзалӣ Файзалӣ, муовинони директор, сардорони воҳидҳои сохторӣ ва кормандони дигари Марказ бахшида ба 31-умин солгарди Истиқлолияти давлатии Ҷумҳурии Тоҷикистон ҷаласа баргузор гардид.
Дар ин ҷаласа директори Марказ муҳтарам Ҷаъфарзода С.Ф. суханронӣ ва қайд намуд, ки имрӯз Истиқлолияти давлатии Ҷумҳурии Тоҷикистонро аксари кишварҳои ҷаҳон ба расмият шинохта, кишвари мо бо эътироф кардани асноди робитаҳои байналмилалӣ, аз ҷумла Оинномаи Созмони Милали Муттаҳид ва дигар санадҳо зербинои сиёсати дохилӣ ва хориҷии худро бунёд карда, инсон ва ҳифзи ҳуқуқу озодиҳои онро арзиши олӣ мешуморад.
Дар ҷаласаи мазкур инчунин кормандони Марказ дар бораи Истиқлолияти давлатӣ ва аҳаммияти он барои миллати тоҷик, дастовардҳои даврони соҳибистиқлолӣ суханронӣ карданд.
Дар фарҷоми ҷаласа аз ҷониби роҳбарияти Марказ як қатор кормандони он барои фаъолияти пурсамар ва ҳамеша босифату сари вақт иҷро кардани уҳдадориҳои мансабӣ бо сипосномаҳо қадрдонӣ гардиданд.
