Душанбе, 21-уми сентябри соли 2024
Ба таваҷҷуҳи довталабони дар давраи сеюми бақайдгирӣ барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон (ИМД) дар соли 2024 номнависшуда расонда мешавад, ки имтиҳонҳо – қисмҳои А (имтиҳон дар заминаи таҳсилоти умумӣ) ва Б (имтиҳон дар заминаи таҳсилоти умумии асосӣ) рӯзи якшанбе – 22-юми сентябри соли 2024 баргузор карда мешавад.
Бо дар дарназардошти ғунҷоиши марказҳои имтиҳонӣ (теъдоди ҷойҳои нишаст) қисми Б (имтиҳон дар заминаи таҳсилоти умумии асосӣ – синфи 9-ум) дар нимаи аввал рӯз (оғози имтиҳон – 09:00) ва қисми А (имтиҳон дар заминаи таҳсилоти миёнаи умумӣ – синфи 11-ум) дар нимаи дуюми рӯз (оғози имтиҳон – 14:00) баргузор мегардад. Лозим ба зикр аст, ки вақти ҳозиршавии довталаб дар маркази имтиҳонӣ дар паёмаки фиристодашуда ва кабинети инфиродии довталаб нишон дода шудааст. Бояд таъкид кард, ки довталаб бояд дар маркази имтиҳонӣ 1 соату 30 дақиқа пеш аз оғози имтиҳон бо шиноснма ё ҳуҷҷати дигари тасдиқкунандаи шахсияташ (бо муҳр ва сурат) ва ду ручкаи одии рангаш сиёҳ ҳозир шавад.
Маълумоти мушаххас дар бораи макон ва замони имтиҳонсупорӣ ба ҳар як довталаб тавассути паёмак (SMS) фиристода шудааст. Ин маълумот барои довталабон дар кабинети инфиродияшон низ нишон дода шудааст. Агар довталаб дар бораи макон ва замони имтиҳонсупорияш то ҳол маълумот пайдо накарда бошад, барои дарёфт кардани ин маълумот метавонад бо рақами телефони 224 53 68 дар тамос шавад.
Ба довталабон тавсия медиҳем, ки аз рӯйи паёмак ва ё даъватнома дар бораи нишонӣ ва нуқтаи роҳнамои маркази имтиҳоние, ки дар паёмак ва ё даъватномаашон нишон дода шудааст, аз рӯйхати дар сомонаи Марказ ҷойгиркардашуда (https://ntc.tj/tj/hamai-khabarho/markazhoi-imtihoni-baroi-barguzorii-davri-seyumi-imd-2024.html) маълумот гирифта, бо макони имтиҳонсупориашон пешакӣ шинос шаванд, то ки дар рӯзи имтиҳон дар ёфтани маркази имтиҳонӣ ба мушкил дучор нагарданд.
Хотиррасон мекунем, ки бо худ даъватнома доштан барои воридшавии довталабон ба маркази имтиҳонӣ ҳатмӣ нест. Кофист, ки довталаб дар бораи макон ва замони имтиҳонсупориаш маълумот дошта бошад.
