Душанбе, 8-уми майи соли 2025
8-уми майи соли 2025 дар дафтари асосии Маркази миллии тестии назди Президенти Ҷумҳурии Тоҷикистон ба муносибати 80-солагии Ғалаба дар Ҷанги Бузурги Ватании солҳои 1941-1945 ҷаласаи тантанавӣ баргузор гардид.
Ҷаласаро муовини директори Марказ Олимҷонзода Уктам Олимҷон кушода, кормандони Марказро ба муносибати таҷлили 80-солагии пирӯзӣ бар фашизм табрик намуда, иброз дошт, ки дар таърихи инсоният санаҳое ҳастанд, ки бо гузашти солҳо аҳаммият ва бузургии онҳо боз ҳам бештар аён мегардад. Ҳар сол дар кишвари азизу маҳбуби мо ба хотири посдорӣ аз хотираи неки фарзандони Тоҷикистон ва корнамоиву қаҳрамониҳои онҳо, ки баҳри ҳифзи халқу Ватан дар Ҷанги Бузурги Ватанӣ ҷон фидо намуданд, рӯзи 9-уми май ҳамчун Иди ғалаба ҷашн гирифта мешавад. Ҳамаи ин фидокориву ҷоннисориҳои иштирокдорони Ҷанги Бузурги Ватанӣ то имрӯз дар хотири мардум нақш бастааст ва мардум бо некӣ аз қаҳрамониҳои онҳо ёд мекунанд.
Дар идома муовини директори Марказ Олимҷонзода У. О. зикр намуд, ки Ҳукумати Ҷумҳурии Тоҷикистон таҳти роҳбарӣ ва сиёсати хирадмандонаву инсонпарваронаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон хотири иштирокчиёни Ҷанги Бузурги Ватаниро пос медорад ва онҳоеро, ки дар қайди ҳаёт ҳастанд, мавриди дастгириву таваҷҷуҳи махсус қарор додааст.
Сипас як қатор кормандони Марказ низ ба муносибати таҷлили 80-солагии Ғалаба дар Ҷанги Бузурги Ватании солҳои 1941-1945 суханронӣ карданд. Таъкид гардид, ки Ҷанги дуюми ҷаҳон дар таърихи навини башарият аз лиҳози миқёс ва фоҷиаи инсонӣ ҷанги даҳшатноктарин ба шумор меравад. Беш аз 70 кишвари ҷаҳон ба гирдоби ҷанг кашида шуда, дар он зиёда аз 55 миллион нафар одам қурбон гардида, даҳҳо ҳазор шаҳрҳои хурду бузург вайрону валангор ва ба хок яксон шуданд.
