Душанбе. 7-уми феврали соли 2014. Марҳалаи аввали семинари омӯзишӣ барои омода кардани бақайдгирандагон дар шаҳри Душанбе ба анҷом расид ва дар натиҷа 42 бақайдгиранда аз байни 56 иштирокдор интихоб шуданд. Дар байни 42 нафари интихобшуда 7 нафар роҳбари нуқтаи бақайдгирӣ, 7 нафар ёвари онҳо ва 28 нафар бақайдгиранда муайян шуданд. Ин теъдоди масъулони бахши қайдгирӣ дар шаҳри Душанбе ва ноҳия Рашт ба кори мавсимӣ ҷалб хоҳанд шуд.
Дар давоми 4 рӯз ба ду гурӯҳи шунавандагон мутахассисони Маркази миллии тестӣ доир ба раванди бақайдгирии довлаталабон бо истифода аз технологияи муосир дарсҳои амаливу назариявӣ гузаронида, тавассути санҷиш масъулонро интихоб намуданд.
Яке аз фаъолони семинари марказ Парвина Наҷмиддинова, сармутахассиси Раёсати маорифи шаҳри Душанбе, ки қабл аз ин дар озмоиши калони соли гузашта ба ҳайси роҳбари маркази имтиҳонӣ фаъолият мекард, дар бораи марҳалаи омодасозии бақайдгирандагон мегӯяд: “Омӯзише, ки банда дар он иштирок доштам дар сатҳи хеле баланд гузашт. Мутахассисони Марказ ба мо тамоми марҳалаи сабти номи довталабон, тартибу қоидаҳо, тарзи истифодаи барномаи бақайдгирии довталабон дар нуқтаҳои бақайдгирӣ ва дигар паҳлуҳои раванди мазкурро фаҳмонда доданд. Бояд гуфт, ки аз ҷониби Марказ ба семинари мазкур он нафароне ҷалб шудаанд, ки аз технологияи муосир бархӯрдоранд. Зеро воридкунии маълумот дар бораи довталабон ба пойгоҳи додаҳо тариқи барномаи компютерии махсус сурат мегирад.”
Тӯли як моҳ силсилаи семинарҳо дар 4 минтақаи ҷумҳурӣ: вилояти Суғд аз 11-ум то 14-уми феврал, вилояти Хатлон аз 18-ум то 21-уми феврал, ВМКБ аз 25-ум то 26-уми феврал баргузор мешаванд. Дар шаҳри Душанбе омӯзиш аз 4-уми феврал то 7-уми баргузор шуд.
Тибқи эълони пешакӣ, барои 20 нуқтаи бақайдгирӣ, ки аз ҷониби Марказ дар 11 шаҳру навоҳии кишвар таъсиси дода шудааст, 164 нафар ҳуҷҷат супурдаанд. Дар интиҳои тамоми омӯзишҳо Марказ аз байни иштирокдорон дар маҷмӯъ 120 нафари арзандаро ба ҳайси бақайдгирандагони оянда интихоб мекунад.
Ёдовар мешавем, ки 1-уми март давраи бақайдгирии довталабон ба муассисаҳои олии кишвар оғоз мешавад ва то 15-уми апрели соли идома меёбад.
