Душанбе, 3-юми августи соли 2016
Бо ташаббуси Маркази миллии тести назди Президенти Ҷумҳурии Тоҷикистон ва дастгирии Вазорати маориф ва илми Ҷумҳурии Тоҷикистон 2-юми августи соли 2016 дар толори Донишкадаи ҷумҳуриявии такмили ихтисос ва бозомўзии кормандони соҳаи маориф вохўрӣ бо ректорону директорони муассисаҳои таҳсилоти миёна ва олии касбии шаҳри Душанбе ва котибони масъули комиссияҳои қабули ҳамаи 59 муассисаи таҳсилоти миёна ва олии касбии ҷумҳурӣ, ки донишҷӯён тибқи имтиҳонҳои марказонидаи дохилшавӣ қабул карда мешаванд, баргузор гардид.
Дар расми ифтитоҳи вохўрӣ вазири маориф ва илм Нуриддин Саид суханронӣ намуда, иброз дошт, ки мақсад аз ҳамоиши имрўза, пеш аз ҳама, роҳ надодан ба ҳолатҳои коррупсионӣ ва шинос намудани роҳбарону котибони масъули комиссияҳои қабули муассисаҳои таълимӣ бо тартиби тақсимоти довталабон ба муассисаҳои таҳсилоти олӣ ва миёнаи касбӣ ва низоми ҳуҷатнигорӣ мебошад.
Аз роҳбарони муассисаҳои таҳсилоти миёна ва олии касбӣ хоҳиш карда мешавад, ки қабулро ба муассисаҳои таълимӣ танҳо дар асоси рўйхати пешниҳодменамудаи Маркази миллии тестӣ ба роҳ монанд. Ҳеҷ як роҳбари муассисаи таълимӣ берун аз рўйхати пешниҳоднамудаи Маркази миллии тестӣ ҳуқуқи қабул намудани донишҷўро надорад. Агар ин ё он муассисаи таълимӣ нақшаи қабулро иҷро накард, ин аз он шаҳодат медихад, ки роҳбари муассиса корҳои таблиғотиву муаррифии ихтисосҳоро дуруст ба роҳ намондааст, - қайд кард Нуриддин Саид.
Дар идомаи суҳбат вазири маориф ва илм Нуриддин Саид вобаста ба қабул намудани донишҷўён тариқи суҳбат барои идомаи таҳсил, дар доираи қонунҳои амалкунанда ба роҳ мондани интиқоли донишҷўён аз як ихтисос ба ихтисоси дигар, баргузор намудани тақсимоти такрорӣ дар Маркази миллии тестӣ ва чанде дигар ибрози андеша намуд.
Ҳамчунин, муовини вазири маориф ва илм Б.Одиназода, муовини аввали директори маркази миллии тестӣ С.Ҷаъфаров, сардори шуъбаи кор бо муассисаҳои таълимии таҳсилоти миёна ва олии касбӣ М.Шодиев суханронӣ намуда, ҳозиринро бо тартиби бақайдгирии донишҷӯён дар муассисаҳои таълимӣ, дуруст ба роҳ мондани тартиби ҳуҷҷатгузорӣ ва дигар нозукиҳои ҷойдошта дар ин самт ошно карданд.
Иттилоъ дода шуд, ки барои соли таҳсили 2016-2017 тибқи нақшаи қабул ба муассисаҳои таҳсилоти миёна ва олии касбӣ 54827 ҷой ҷудо шуда, 83597 нафар дар Маркази миллии тестӣ аз қайд гузаштааст, ки аз ин теъдод 48053 нафар писар ва 35544 нафар духтар мебошад. Аз теъдоди азқайдгузаштагон беш аз 78 ҳазор ба имтиҳонҳо ҳозир шуданд ва 59260 нафар холи зарурии гузаришро ба даст оварда, ба озмуни тақсимот роҳ ёфтанд.
Дар идома мубодилаи афкор сурат гирифта, иштирокдорон аз ҳисоби намояндагони муассисаҳои таҳсилоти миёна ва олии касбӣ ба суолҳои худ посухҳои мушаххас гирифтанд.
