Душанбе, 21‑уми ноябри соли 2014
18‑уми ноябри соли ҷорӣ дар Дастгоҳи иҷроияи Президенти Ҷумҳурии Тоҷикистон ҷаласаи нахустини Шӯрои миллии рушди маорифи назди Ҳукумати Ҷумҳурии Тоҷикистон таҳти роҳбарии муовини Сарвазири мамлакат Марҳабо Ҷабборӣ баргузор гардид.
Дар кори Шӯро вазири маориф ва илми Ҷумҳурии Тоҷикистон, президенти Академияи илмҳои Ҷумҳурии Тоҷикистон, раиси Шӯрои уламои Маркази исломии Тоҷикистон, муовинони вазирону раисони вазорату кумитаҳои дахлдори ҷумҳурӣ, котиби Шӯрои ҷамъиятии Тоҷикистон ва кормандони Дастгоҳи иҷроияи Президенти Ҷумҳурии Тоҷикистон иштирок доштанд.
Дар рӯзномаи Шӯро чор масъала мавриди баррасӣ қарор гирифт, ки яке аз онҳо “Натиҷаи имтиҳонҳои марказонидаи дохилшавӣ ба муассисаҳои таҳсилоти олии касбии ҷумҳурӣ дар соли 2014” буд. Оид ба масъалаи мазкур иштирокдорон ҳисоботи директори Маркази миллии тестии назди Президенти Ҷумҳурии Тоҷикистон Хуршед Тешаевро шуниданд.
Дар рафти муҳокимаи масъалаи мазкур, вобаста ба шакли пешниҳоди натиҷаҳои ИМД-2014 барои масъулони соҳа ва шаҳрвандон, квотаи президентӣ барои хонандагони шаҳру ноҳияҳо дар МТОК-и ҷумҳурӣ барои соли таҳсили 2015‑2016, бозбинии шомил будани баъзе аз муассисаҳои таҳсилоти олии касбӣ ва ихтисосҳои дорои хусусияти эҷодӣ дар низоми ИМД саволу ҷавоб доир гардида, як зумра тавсияҳои мушаххас аз ҷониби муовини Сарвазири Ҷумҳурии Тоҷикистон М.Ҷабборӣ, президенти Академияи илмҳои Ҷумҳурии Тоҷикистон Ф. Раҳимӣ, раиси Шӯрои ректорони Тоҷикистон М.Имомов, муовини вазири адлияи Ҷумҳурии Тоҷикистон Ҳ. Мирсаев, муовини вазири фарҳанги Ҷумҳурии Тоҷикистон Б.Одинаева, муовини вазири саноат ва технологияи нави Ҷумҳурии Тоҷикистон Ҳ.Холов, президенти Академияи таҳсилоти Тоҷикистон академик И.Каримова, муовини раиси шаҳри Душанбе Р.Қурбонова ва муовини раиси вилояти Суғд Р.Бобоҷониён пешниҳод гардиданд.
Барои дар сатҳи Ҳукумати Ҷумҳурии Тоҷикистон баррасӣ намудани таклифу пешниҳодҳо атрофи масъалаҳои мавриди музокираи аъзои Шӯрои миллии рушди маориф қарор қабул карда шуд.
