Душанбе, 26-уми сентябри соли 2018
Дар маҷлисгоҳи Маркази миллии тестии назди Президенти Ҷумҳурии Тоҷикистон бо иштироки кормандони он ҷаласаи умумӣ баргузор гардид, ки рӯзномаи он масъалаҳои марбут ба мубориза бо коррупсияро дар бар гирифт. Барои иштирок дар ҷаласа нозири калони Сарраёсати пешгирии коррупсияи Агентии назорати давлатии молиявӣ ва мубориза бо коррупсияи Ҷумҳурии Тоҷикистон Бойзод Х. Р. даъват карда шуд.
Дар ҷаласа ба кормандон дар бораи натиҷаи санҷиши рафти иҷрои Нақшаи чорабиниҳои татбиқи “Стратегияи муқовимат ба коррупсия дар Ҷумҳурии Тоҷикистон барои солҳои 2013-2020” дар Марказ, ки дар асоси фармоиши директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз 30‑юми июли соли 2018, №107 сурат гирифта буд, маълумоти муфассал дода шуд. Директори Марказ Икромӣ Х. И. қайд кард, ки тибқи “Стратегияи муқовимат ба коррупсия дар Ҷумҳурии Тоҷикистон барои солҳои 2013-2020”, ки бо Фармони Президенти Ҷумҳурии Тоҷикистон аз 30‑юми августи соли 2013, № 1504 тасдиқ шуда, муқовимат ба коррупсия қисми таркибии сиёсати дохилӣ ва хориҷии Ҷумҳурии Тоҷикистон маҳсуб ёфта, таҳия ва татбиқи он аз иродаи олии сиёсии роҳбарияти давлат оғоз мегардад. Самаранокии муқовимат ба коррупсия аз иштироки фаъоли тамоми шохаҳои ҳокимияти давлатӣ ва ҷомеаи шаҳрвандӣ дар раванди амалигардии он вобастагии зич дорад.
Икромӣ Х. И. баён дошт, ки санҷиш нишон дод, ки гарчанде дар доираи иҷрои Нақшаи чорабиниҳои татбиқи Стратегияи зикршуда дар Марказ як қатор корҳо ба анҷом расонида шуда бошанд ҳам, дар ин самт баъзе аз камбудиҳо низ ҷой доранд ва бартараф кардани онҳо амри зарур ва муҳим мебошад.
Директори Марказ Икромӣ Х. И. таъкид кард, ки ҳамаи кормандони Марказро зарур аст, ки иҷрои уҳдадориҳои мансабии худро софдилона ва беғаразона минбаъд низ идома дода, барои бартараф кардани камбудиҳое, ки санҷиши мазкур нишон дод, тамоми саъю кӯшиши худро равона карда, чораҳои амалӣ андешанд.
Кормандони Марказ пешниҳодҳои Агентии назорати давлатии молиявӣ ва мубориза бо коррупсияи Ҷумҳурии Тоҷикистон дастгирӣ карда, вобаста аз масъалаҳои баррасишуда ва дастуру супоришҳои роҳбарияти Марказ дар самти иҷрои Нақшаи чорабиниҳои татбиқи “Стратегияи муқовимат бо коррупсия дар Ҷумҳурии Тоҷикистон барои солҳои 2013-2020” таклифу пешниҳодҳои худро ироа намуданд.
