Душанбе, 1-уми июни соли 2015
Маркази миллии тестии назди Президенти Ҷумҳурии Тоҷикистон аз 1-ум то 16-уми июни соли ҷорӣ дар 21 шаҳру ноҳияи кишвар оид ба ташкил ва идораи имтиҳонҳои марказонидаи дохилшавӣ – 2015 семинарҳои омӯзишии кормандони муваққатиро баргузор мекунад.
Мақсад аз ташкилу баргузории семинарҳо омӯзиш, интихоб ва таъйини кормандони муваққатии марказҳои имтиҳон ба сифати роҳбарони марказҳои имтиҳон ва ёварони онҳо, маъмурони калон, маъмурони имтиҳон ва бақайдгирандагони маркази имтиҳон аст, ки барои идора кардани раванди имтиҳон ҷалб мешаванд.
Дар давоми 16 рӯз таҳти роҳбарии шахсони масъули Марказ тренероне, ки қаблан барои омода кардани кормандони муваққатӣ омӯзонида шудаанд, барои иштирокдорон машғулиятҳо доир мекунанд.
Лозим ба қайд аст, ки тибқи эълони Марказ барои ҷалби кормандони муваққатӣ 2900 нафар барои иштирок дар семинарҳо ҳуҷҷат супорида буданд ва аз ин ҳисоб 2040 нафарашон бо назардошти мувофиқат ба талаботу меъёрҳои Маркази миллии тестии назди Президенти Ҷумҳурии Тоҷикистон барои иштирок дар семинарҳо даъват карда шуданд.
Аз рӯйи нақша мутахассисони Марказ дар бораи воридшавӣ ва бақайдгирии довталабон ба маркази имтиҳон, ҷобаҷокунии довталабон дар синфахонаҳои имтиҳон, қоидаю талаботи муқарраргардидаи тартиби баргузории имтиҳонҳо, раванди имтиҳон дар синфхонаҳои имтиҳон ва ғайра дарсҳои амаливу назариявӣ мегузаронанд. Баъдан дар асоси озмун кормандони муваққатиро ба вазифаҳои дахлдор интихоб менамоянд.
Ёдовар мешавем, ки имтиҳонҳои эҷодӣ ва маҳорат аз 20-ум то 30-юми июн ва имтиҳонҳои қисми А (умумӣ) ва қисми Б (ихтисос) аз 1-ум то 12-уми июл баргузор мешаванд.
