Душанбе, 19-уми июни соли 2018

Ба диққати довталабоне, ки барои иштирок дар имтиҳонҳои марказонидаи дохилшавӣ дар соли 2018 аз қайд гузаштаанд, расонида мешавад, ки рӯйхати муассисаҳои таълимии таҳсилоти миёнаи умумие, ки дар заминаи онҳо марказҳои имтиҳонӣ барои баргузории имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар соли 2018 ташкил карда мешаванд, дар сомонаи Марказ ҷой дода шудааст.

Рӯйхати мазкур бо фармоиши Вазорати маориф ва илми Ҷумҳурии Тоҷикистон аз 17-уми майи соли 2018, № 1854 тасдиқ гардидааст. Дар ин рӯйхат нишонии ҳар як муассисаи таълимии дар заминаи он маркази имтиҳонӣ ташкилшаванда ва нуқтаи роҳнамо (ориентир) ба он оварда шудааст.

Тибқи рӯйхати мазкур, ки дар асоси таҳлили шумораи умумии хатмкунандагон ва довталабони азқайдгузашта вобаста аз шаҳру ноҳияҳо ҷиҳати таъмини дастрасии осони довталабон таҳия гардидааст, барои имтиҳонсупории довталабон дар 18 шаҳру ноҳияи интихобшудаи ҷумҳурӣ 48 маркази имтиҳонӣ ташкил карда мешавад.

Ба довталабон тавсия медиҳем, ки дар бораи нуқтаи роҳнамои маркази имтиҳоние, ки дар даъватномаашон нишон дода шудааст, аз рӯйхати зикргардида маълумот гирифта, бо макони имтиҳонсупориашон пешакӣ шинос шаванд, то ин ки дар рӯзи имтиҳон дар ёфтани макони ҷойгиршавии маркази имтиҳонӣ ба мушкил дучор нагарданд. Хотиррасон мекунем, ки даъватнома ба макони дар бақайдгирӣ интихобкардаи ҳар довталаб фиристода шуда, гуна (версия)-и электронии он дар кабинети инфиродии довталаб ҷойгир карда шудааст.

Довталаб бояд бо даъватнома, шиноснома ё ҳуҷҷати дигари тасдиқкунандаи шахсияташ бо муҳр ва сурат ба маркази имтиҳонӣ аз рӯйи ҷадвали имтиҳонҳо дар рӯзи муайяншуда 1 соату 30 дақиқа пеш аз оғози имтиҳон ҳозир шавад.