Душанбе, 29-уми июни соли 2018
Дар толори маҷлисгоҳи Вазорати маориф ва илми Ҷумҳурии Тоҷикистон бо иштироки муовини аввали вазири маориф ва илм Мирбобоев Р. М. ва намоянда аз Прокуратураи генералии Ҷумҳурии Тоҷикистон Наботов М., инчунин аз Агентии назорати давлатии молиявӣ ва мубориза бо коррупсияи Ҷумҳурии Тоҷикистон Турсунзода Ш. директори Марказ Икромӣ Х. ва муовини якуми Марказ Ҷаъфаров Ф. ҷаласаи машваратӣ бо шахсони масъули роҳбарикунандаи ташкил, баргузорӣ ва назорати имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ дар соли 2018 дар марказҳои имтиҳонӣ баргузор гардид. Ҷаласаро муовини аввали вазири маориф ва илм Мирбобоев Р. ифтитоҳ карда, қайд намуд, ки баргузории имтиҳонҳои марказонидаи дохилшавӣ аз ҷумлаи чорабиниҳое мебошад, ки нигоҳи тамоми қишрҳои ҷомеа ба он нигаронида мешавад. Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон, Маркази миллии тестиро ҳамчун низоми таъминкунандаи шафофият, адолат ва арзёбии баробари донишу маҳорати довталабон дар имтиҳонҳо эътироф намуда, инро дар баромадҳояшон қайд менамоянд.
Намоянда аз Прокуратураи генералии Ҷумҳурии Тоҷикистон Наботов М. зимни суханронияш гуфт, ки ҳамаи сохторҳои ҷомеа бо тартиби муайяннамудаи қонунгузорӣ фаъолияти худро пеш мебаранд. Маркази миллии тестии назди Президенти Ҷумҳурии Тоҷикистон низ тартиби муайяни кори худро дорад ва дар ин самт дар ҳаҷми 60 саҳифа ”Тартиби баргузории имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон”-ро, ки бо қарори Ҳукумати Ҷумҳурии Тоҷикистон аз 1-уми марти соли 2018,№ 81 дар таҳрири нав тасдиқ гардидааст, мураттаб кардааст. Ҳар як корманди доимӣ ва муваққатии Марказ бояд аз ин тартиб, лоақал аз бахшҳои ба худ марбут огоҳ бошад ва худро дар иҷрои вазифаҳояш масъул ҳис намояд.
Турсунзода Ш. – намояндаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар суханронияш аз ҷумла, қайд кард, ки имрӯзҳо Маркази миллии тестӣ тавонист, ки бовари ҷомеаро нисбат ба фаъолияти худ, бахусус нисбат ба шаффофияти раванди имтиҳонҳо, арзёбии воқеъбинонаю одилонаи дониши довталабон афзояд. Аз рӯзи бунёди Маркази миллии тестии назди Президенти Ҷумҳурии Тоҷикистон дар самти дохилшавӣ амалҳои коррупсионӣ дар ҷомеа кам ба чашм мерасад.
Директори Маркази миллии тестии назди Президенти Ҷумҳурии Тоҷикистон Икромӣ Х. дар суханронияш аз ҳозирин хоҳиш намуд, ки кори худро софдилонаю аз рӯйи виҷдону инсоф ба анҷом расонанд. Ҳар яки шумо, ки дар 47 маркази имтиҳонии воқеъ дар 18 шаҳру ноҳияи ҷумҳурӣ фаъолият хоҳед кард, бояд ҳушёру зирак бошед, уҳдадориҳои худро комилан бидонед. Мову шумо бояд довталабону падару модари онҳо ва дигар алоқамандони ИМД-ро муътақид созем, ки дар имтиҳонҳои мазкур ба ҷуз донишу маҳорати довталаб дигар чизе ба ӯ кумак карда наметавонад. Бинобар ин, набояд касе ба фиребу дурӯғи қаллобон дода шавад. Шуморо, ки мо имрӯз бовар карда, ба кори пурмасъулият ҷалб намудем, лозим аст, ки бо дилу нияти соф фаъолият кунед ва ба ин боварӣ сазовор шавед, ‒ таъкид кард Икромӣ Х.
