ЭЪЛОН

БАҚАЙДГИРИИ ИЛОВАГИИ ДОВТАЛАБОН БАРОИ ИШТИРОК ДАР ИМД-2015

Душанбе, 18-уми июни соли 2015

Маркази миллии тестии назди Президенти Ҷумҳурии Тоҷикистон иттилоъ медиҳад, ки барои шахсоне, ки бо сабаби узрноки бо ҳуҷҷат тасдиқшуда дар давраи бақайдгирии асосӣ (аз 2‑юми март то 30‑юми апрел) аз қайд гузашта натавонистаанд, аз ҷумла шахсоне, ки дар муҳоҷирати меҳнатӣ, таҳсил ё табобат берун аз Ҷумҳурии Тоҷикистон, дар хизмати ҳарбӣ дар Қувваҳои Мусаллаҳи Ҷумҳурии Тоҷикистон қарор доштанд ва мақсади иштирок дар имтиҳонҳои марказонидаи дохилшавиро доранд, бақайдгирии иловагӣ баргузор мегардад.

Бақайдгирии иловагӣ аз 20‑ум то 30‑юми июни соли 2015 дар Маркази миллии тестии назди Президенти Ҷумҳурии Тоҷикистон (шаҳри Душанбе, хиёбони Рӯдакӣ, 192) доир карда мешавад.

Барои гузаштан аз бақайдгирии иловагӣ бояд ҳуҷҷатҳои зерин пешниҳод карда шавад:

1) ариза барои иҷозати гузаштан аз бақайдгирии иловагӣ ҷиҳати иштирок дар ИМД-2015 (шакли аризаро бояд аз Марказ дастрас кард);

2) асл ва нусхаи шиноснома ё ҳуҷҷати тасдиқкунандаи шахсият бо сурат, ки мақоми ваколатдори давлатӣ додааст;

3) асл ва нусхаи шиносномаи хориҷӣ бо муҳри убури марзи Ҷумҳурии Тоҷикистон (барои шахсоне, ки дар муҳоҷирати меҳнатӣ қарор доштанд);

4) асл ва нусхаи билет (шаҳодатнома)‑и ҳарбӣ (барои шахсоне, ки муҳлати хизматашон дар Қувваҳои Мусаллаҳи Ҷумҳурии Тоҷикистон пас аз давраи бақайдгирӣ ба анҷом расидааст);

5) асл ва нусхаи аттестати хатми муассисаи таҳсилоти миёнаи умумӣ ва ё дипломи хатми муассисаи таҳсилоти ибтидоӣ ё миёнаи касбӣ;

6) расиди пардохти маблағ дар яке аз филиалҳои Бонки давлатии амонатгузории Ҷумҳурии Тоҷикистон “Амонатбонк” барои иштирок дар ИМД-2015.

Арзиши хизматрасонӣ дар ИМД 170 (яксаду ҳафтод) сомонӣ буда, ятимони кулл ва бепарасторон, ки хоҳиши иштирок дар имтиҳонҳои мазкурро доранд, аз пардохти маблағ пурра озоданд. Довталабоне, ки падар ё модарашон вафот кардаанд, барои иштирок дар имтиҳонҳои марказонидаи дохилшавӣ танҳо 50 дарсади маблағи муайяншударо – 85 сомонӣ пардохт мекунанд.

Довталабони имтиёздор бояд ҳангоми бақайдгирӣ ҳуҷҷатҳои дахлдори зеринро пешниҳод кунанд:

- хатти вафоти падару модар (асл ва нусха) ва шаҳодатнома дар бораи таваллуд (асл ва нусха) – барои ятимони кулл;

- хатти вафоти падар ё модар (асл ва нусха) ва шаҳодатнома дар бораи таваллуди довталаб (асл ва нусха) – барои ятимон;

- ҳуҷҷати тасдиқкунанда дар бораи бепарастор будан, ки мақомоти ваколатдори давлатӣ додааст (асл ва нусха) – барои шахсоне, ки бепарастор ҳастанд.

Маблағ бояд пеш аз бақайдгирӣ дар яке аз филиалҳои зерини Бонки давлатии амонатгузории Ҷумҳурии Тоҷикистон “Амонатбонк” дар ноҳияҳои шаҳри Душанбе пардохт карда шавад:

1) филиали № 04 н. Сино (кӯчаи Саъдии Шерозӣ, 45 (собиқ мағозаи “Моҳи нав”), тел. 600-90-47);

2) филиали № 05 н. Исмоили Сомонӣ (кӯчаи Ҳофизи Шерозӣ, 14/1 (назди МТМУ № 70, хонаҳои Қайроққум), тел. 600-90-51);

3) филиали № 06 н. Фирдавсӣ (кӯчаи Борбад, 94/1 (назди маркази савдои “Мардон”), тел. 600-90-46);

4) филиали № 07 н. Шоҳмансур (хиёбони Рӯдакӣ, 2а (Саристгоҳи роҳи оҳан), тел. 600-90-36).

Хотиррасон мекунем, довталабоне, ки ҳангоми бақайдгирии асосӣ аз қайд нагузаштаанд, дар ин давра ба қайд гирифта намешаванд.

Дар зарурат метавонед бо телефонҳои хатти мустақим (24 53 66, 224 53 67, 224 53 68) маълумоти иловагӣ гиред.