Барои хизматрасонӣ дар ИМД (минбаъд – хизматрасонӣ) довталабон маблағи муқарраргардидаро пардохт мекунанд.
Арзиши хизматрасониро мутобиқи қонунгузории Ҷумҳурии Тоҷикистон ҳар сол то оғози давраи бақайдгирӣ Марказ дар мувофиқа бо Хадамоти зиддиинҳисории назди Ҳукумати Ҷумҳурии Тоҷикистон муқаррар мекунад. Тибқи “Тартиби гузаронидани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон”, ки бо қарори Ҳукумати Ҷумҳурии Тоҷикистон аз 1‑уми марти соли 2018, № 81 тасдиқ шудааст, шахсони то 21-солаи ятим ё бепарастор аз пардохти маблағи хизматрасонӣ дар ИМД озоданд. Инчунин, тибқи тартиби мазкур “кӯдакони маъюб” ва маъюбони гурӯҳҳои 1-ум ва 2-юм ва шахсони то 21-сола, ки падар ё модарашон вафот кардааст ё дар парастории яке аз онҳоянд, барои иштирок дар ИМД 50 дарсади маблағи муайяншударо пардохт мекунанд. Агар довталаб ҳам нимятим ва ҳам “кӯдаки маъюб” ё маъюби гурӯҳи 1-ум ё 2-юм бошад, аз пардохти маблағи хизматрасонӣ дар ИМД озод аст. Шахсони мазкур ҳангоми бақайдгирӣ бояд ҳуҷҷатҳои дахлдорро пешниҳод кунанд.
Қабули маблағ барои хизматрасониҳо аз довталаб ва баргардонидани он ҷиҳати иштирок дар ИМД аз рӯйи Тартиби мазкур ба роҳ монда мешавад.
Қабули маблағи хизматрасонӣ дар филиалҳои Бонки давлатии амонатгузории Ҷумҳурии Тоҷикистон “Амонатбонк” дар шаҳру ноҳияҳои ҷумҳурӣ ба расмият дароварда мешавад.
Маблағи барои хизматрасонӣ пардохткардаи чунин шахсон баргардонида мешавад:
1) соҳиби расиди бонкӣ, ки аз номнависӣ барои иштирок дар ИМД даст кашидааст. Шахсе соҳиби расиди бонкӣ номида мешавад, ки расиди бонкӣ ба номи ӯ ба расмият дароварда шудаасту аммо ин шахс барои иштирок дар ИМД худро номнавис накардааст (ба шарти пешниҳоди расиди бонкӣ);
2) довталабе, ки:
- аз иштирок дар имтиҳонҳо даст кашидааст;
- аз миқдори маблағи муқарраршуда барзиёд пардохт кардааст;
- маблағи барои азнавбақайдгирӣ муқарраршударо пардохтаасту аммо дар ин марҳала худро сабти ном накардааст (азнавбақайдгириро нагузаштааст, ба шарти пешниҳоди расиди бонкӣ);
- бо сабаби узрноки аз ӯ вобастанабуда дар имтиҳонҳо иштирок карда наметавонад;
- хатмкунандаи муассисаи таълимии таҳсилоти умумии асосӣ, миёнаи умумӣ, ибтидоии касбӣ ё миёнаи касбӣ буда, бинобар аз аттестатсияи хатм ё ҷамъбастӣ нагузаштанаш дар имтиҳонҳо иштирок карда наметавонад;
- бинобар ба муассисаи таълимии таҳсилоти олии касбӣ тибқи квотаи Президенти Ҷумҳурии Тоҷикистон дохил шуданаш дар имтиҳонҳо иштирок намекунад;
- тибқи тартиби муқарраршуда ҳуқуқи аз пардохти тамоми маблағи хизматрасонӣ ё қисме аз он озод буданро дорад, вале ин маблағро пурра пардохтааст;
- довталабе, ки аз пардохти тамоми маблағ барои хизматрасонӣ ё қисме аз он озод асту маблағро қисман, пурра ё барзиёд пардохт кардааст;
- довталабе, ки маблағи муқарраршударо барои супоридани имтиҳон дар даври иловагӣ пардохтаасту аммо дар муҳлати муқарраргардида ба Марказ аризаро барои иштирок дар ин давр пешниҳод накардааст.
Вобаста аз ҳолатҳои зикршуда маблағи барои хизматрасонӣ пардохтшуда дар сурате баргардонида мешавад, ки агар довталаб дар муҳлати муқарраргардида ба Марказ ариза пешниҳод карда бошад. Маълумоти муфассал дар ин бора пас аз оғози марҳалаи асосии бақайдгирӣ дар сомонаи Марказ ҷойгир карда мешавад.
Агар довталаби худро барои иштирок дар ИМД номнавискарда, аз ширкат дар ин имтиҳонҳо даст кашида, барои бозпас гирифтани маблағи пардохтааш аз муҳлати муқарраршуда дертар ариза диҳад, ин маблағ, ба истиснои ҳолатҳои ғайричашмдошт, ки аз довталаб вобаста нест, ба ӯ баргардонида намешавад. Дар ҳолати тартиби муқарраргардидаи имтиҳонҳоро вайрон карда, аз имтиҳон хориҷ шудани довталаб низ маблағи пардохткардааш бозпас дода намешавад.
|
! |
Агар довталаб аз иштирок дар имтиҳонҳо даст кашад, барои бозпас гирифтани маблағи пардохтааш бояд дар муҳлати муқарраршуда ба Марказ ариза пешниҳод намояд, вагарна ин маблағ, ба истиснои ҳолатҳои ғайричашмдошт, ки аз довталаб вобаста нест, баргардонида намешавад. |
|
Муҳлати охирини пешниҳоди ариза барои баргардонидани маблағи пардохткарда чунин муқаррар гардидааст: ‒ дар давоми 14 рӯзи баъд аз анҷоми марҳалаи асосии азнавбақайдгирӣ – барои шахсоне, ки дар бақайдгирӣ (марҳалаи асосӣ) сабти ном карда, аз иштирок дар ИМД даст мекашанд; ‒ дар давоми 7 рӯзи баъд аз анҷоми марҳалаи иловагии бақайдгирӣ – барои шахсоне, ки дар марҳалаи иловагии бақайдгирӣ ё азнавбақайдгирӣ сабти ном карда, аз иштирок дар ИМД даст кашидаанд; ‒ дар давоми 60 рӯзи баъди ба охир расидани марҳалаи иловагии бақайдгирӣ – барои довталабоне, ки бо сабаби узрноки аз онҳо вобастанабуда дар ИМД иштирок карда натавонистаанд; ‒ то оғози даври асосии имтиҳонҳо – барои довталабоне, ки хатмкунандаи муассисаи таълимии таҳсилоти умумии асосӣ, миёнаи умумӣ, ибтидоии касбӣ ё миёнаи касбӣ буда, бинобар аз аттестатсияи хатм ё ҷамъбастӣ нагузаштанашон дар имтиҳонҳо иштирок карда наметавонанд; ‒ то оғози даври асосии имтиҳонҳо – барои довталабоне, ки бо сабаби ба муассисаи таълимии таҳсилоти олии касбӣ тибқи квотаи Президенти Ҷумҳурии Тоҷикистон дохил шуданашон дар имтиҳонҳо иштирок намекунанд; ‒ дар давоми 60 рӯзи баъди ба охир расидани марҳалаи иловагии бақайдгирӣ – барои довталабоне, ки ҳуқуқи аз пардохти пурраи маблағ ё қисме аз он озод буданро доранду лекин ин маблағро пурра пардохтаанд. |
|
|
! |
Агар аризаи довталаб дар бораи баргардонидани маблағи барои хизматрасонӣ пардохтшуда баъд аз гузаштани муҳлати муқарраршуда ба Марказ пешниҳод гардад, ин маблағ баргардонида намешавад. |
|
Муҳлати пешниҳоди ариза дар бораи баргардонидани маблағи пардохтшуда барои шахсони зерин маҳдуд карда намешавад: ● соҳибони расиди бонкӣ, яъне шахсоне, ки расиди бонкӣ дар дасташон аст (аз қайд нагузаштаанд), инчунин довталабоне, ки аз миқдори маблағи муқарраршуда барзиёд маблағ супоридаанд; ●довталаби маблағи барои хизматрасонӣ муқарраршударо барзиёд пардохта; ● довталаби маблағи барои азнавбақайдгирӣ муқарраршударо пардохтае, ки аз нав аз қайд нагузаштааст; ● довталаби маблағи муқарраршударо барои супоридани имтиҳон дар даври иловагӣ пардохтае, ки дар муҳлати муқарраргардида ба Марказ аризаро барои иштирок дар ин давр пешниҳод накардааст. Агар соҳиби расиди бонкӣ ё довталаби маблағи азнавбақайдгириро пардохтае, ки азнавбақайдгириро нагузаштааст, дар рӯзи амалиёти бонкӣ (рӯзи пардохти маблағ) пеш аз анҷоми вақти кории бонк барои баргардонидани маблағи дар расид нишондодашуда ба нуқтаи бақайдгирӣ, Марказ ё бахши минтақавии он муроҷиат кунад, маблағаш ҳамон рӯз тавассути филиале, ки маблағро дар он додааст, баргардонида мешавад. Дар ҳолатҳои дигар маблағи пардохтгардида дар давоми 45 рӯз баргардонида мешавад. Маблағи пардохтшуда бо кам кардани маблағи дахлдор, ки аз номнавис шудан ё нашудани соҳиби расиди бонкӣ ва сабаби бозпас гирифтани маблағи пардохтшуда вобаста аст, баргардонида мешавад. |
|
