Ҳамкориҳо

Маркази миллии тестӣ дар давоми фаъолияти худ бо муассиса ва ташкилотҳои соҳаи маорифи Ҷумҳурии Тоҷикистон робитаи мустаҳкам дошта, дар самтҳои гуногун бо онҳо ҳамкорӣ мекунад. Чунончи, Маркази миллии тестӣ дар гузаронидани имтиҳонҳо барои дохилшавии шаҳрвандони Ҷумҳурии Тоҷикистон ба муассисаҳои таҳсилоти олии касбии давлатҳои хориҷӣ иштирок намуда, ҷиҳати гузаронидани аттестатсияи давлатии аз синф ба синфгузаронӣ ва имтиҳонҳои хатм тавассути тест дар синфҳои 10 – 11-уми муассисаҳои таҳсилоти миёнаи умумии ҷумҳурӣ дар таҳияи саволу супоришҳои тестӣ бо гурӯҳҳои кории Академияи таҳсилоти Тоҷикистон ҳамкорӣ карда, ёрии методӣ мерасонад ва дар таҳияи саволу супоришҳои тестӣ барои гузаронидани олимпиадаи ҷумҳуриявӣ аз фанҳои гуногун мусоидат менамояд.

Инчунин, Маркази миллии тестӣ бо як қатор ташкилотҳои баймалмилалӣ, аз ҷумла Бонки ҷаҳонӣ, Шуъбаи ташкилоти байналмилалии Институти «Ҷамъияти кушода» – Бунёди мадад дар Тоҷикистон  ҷиҳати омода намудани низоми нави имтиҳонҳои марказонидашудаи дохилшавӣ ба муассисаҳои таҳсилоти олии касбии ҷумҳурӣ ва таҳкими иқтидори нерӯҳои кадрии Маркази миллии тестӣ ҳамкориҳои зич дорад.

Дар доираи ҳамкории Федератсияи Россия ва Ҷумҳурии Тоҷикистон   дар   соҳаи   маориф   кормандон   ва   мутахассисони  Маркази миллии тестӣ дар вебинарҳое, ки аз тарафи Маркази тренингии илм ва маорифи Федератсияи Россия дар Намояндагии ҳамкории Россия ва Тоҷикистон оид ба соҳаи маориф баргузор карда мешаванд, мунтазам иштирок менамоянд.

Инчунин, Маркази миллии тестӣ бо Намояндагии ҳамкории Россия дар Тоҷикистон гуфтушунидҳо гузаронида, дар натиҷа аз ҷониби Намояндагии мазкур ба Маркази миллии тестӣ кӯмаки методию таълимӣ (китобу воситаҳои таълимии марбут ба таҳияи тестҳо) расонида шуд.

Дар давоми фаъолияти худ Маркази миллии тестӣ дар ҳамкорӣ бо ташкилотҳои хориҷӣ, аз ҷумла бо Шуъбаи ташкилоти байналмилалии Институти «Ҷамъияти кушода» – Бунёди мадад ва ҷалби мушовирони байналмилалии ширкати Anglia Assessment Ltd. ба дастовардҳои зерини ноил гардид: 

 § таъсис ва омӯзонидани гурӯҳҳои корӣ – мутахассисон оид ба таҳияи саволу супоришҳои тестӣ;

 § таҳияи намунаҳои тест (тибқи талаботи назарияи классикии тест) аз 12 фанни таълимӣ.

Дар баробари ин, мутахассисони Маркази миллии тестӣ дар ҳамкорӣ бо кормандони Бонки ҷаҳонӣ ва Шуъбаи ташкилоти байналмилалии Институти «Ҷамъияти кушода» – Бунёди мадад лоиҳаи модели низоми нави имтиҳонҳои марказонидашударо ба муассисаҳои таҳсилоти олии касбии Ҷумҳурии Тоҷикистон омода намудаанд, ки айни замон мавриди муҳокима қарор дорад.

            Барои фаъолияти самараноки Маркази миллии тестӣ ва пурзӯр намудани иқтидору тавоноии мутахассисони он Лоиҳаи грантӣ байни Ҳукумати Ҷумҳурии Тоҷикистон ва Ассотсиатсияи байналмилалии рушд ба имзо расонида шуд, ки айни замон мавриди татбиқ қарор дорад.

 

Забонҳо

Намунаи тестҳо

КИТОБҲО

Ҷустуҷӯ дар сомона