БА ДИҚҚАТИ ДОВТАЛАБОН!

Давраи бақайдгирии иловагӣ аз 16 то 30 апрели соли 2014 барои довталабоне, ки дар давраи асосии бақайдгирӣ аз қайд гузашта буданд, муайян карда шудааст.

Дар ин муҳлат довталабон метавонанд номгӯи ихтиссосҳои интихобшуда, муассисаҳои таҳсилоти олии касбӣ, шакл, намуд, забони таҳсил ва дигар маълумоти шахсии худро бо пардохти маблағ дар  филиалҳои Бонки давлатии амонатгузории “Амонатбонк” ба андозаи 14,00 (чордаҳ) сомонӣ иваз намоянд. Бақайдгирии иловагии довталаб ТАНҲО дар нуқтаи бақайдгирие, ки ӯ қаблан дар он сабтином шудааст, ба роҳ монда мешавад.

Аз маблағи муқарраргардида танҳо довталабоне, ки падар ва модари онҳо дар қайди ҳаёт нестанд, озод мебошанд.

Мизи мудаввар дар ММТ

2–юми апрели соли 2014 соати 09:00 дар маҷлисгоҳи Маркази миллии тестии назди Президенти Ҷумҳурии Тоҷикистон мизи мудаввар дар мавзӯи “Қабули имтиҳонҳои эҷодӣ ва маҳорат дар муассисаҳои таҳсилоти олии касбии Ҷумҳурии Тоҷикистон”бо иштироки ректорон ва намояндагони масъули 14 муассисаи таҳсилоти олии касбие, ки имтиҳонҳои эҷодӣ ва маҳорат қабул менамоянд, гузаронида шуд.

Дар ҷамъомад масъалаҳои омодагӣ барои гузаронидани ИЭМ баррасӣ гардид. Аз ҷумла, лоиҳаи ҷадвали гузаронидани имтиҳонҳои мазкур муҳокима ва қабул гардид, ки барои тасдиқ ба Вазорати маориф ва илми Ҷумҳурии Тоҷикистон ирсол мегардад.

Ба диққати довталабон!

Шурӯъ аз 1 уми апрели соли ҷорӣ воридшавӣ ба кабинети инфиродии довталаб дастраст гашт.

Барои ворид шудан ба кабинети инфиродӣ аввал сомонаи Марказро кушода, дар он ба қисмати “Кабинети инфиродӣ” гузаштан лозим аст. Дар равзанаи пайдошаванда дар майдони “Номи корбар” рақами назоратӣ ва дар майдони “Рамз” рамзи муваққатии худро барои истифодаи кабинети инфиродӣ бояд ворид кунед. 

Рақами назоратӣ ва рамзи муваққатиро метавон аз “Варақаи бақайдгирии довталаб” дастрас кард, ки он дар рӯзи сабтином шавӣ дар нуқтаи бақайдгирӣ дода мешавад.

Ҳангоми бори нахуст ворид шудан ба кабинети инфиродӣ система иваз кардани рамзро талаб мекунад, ки онро бояд иҷро кард.

Таъсиси нуқтаҳои нави бақайдгирӣ

Ахиран Маркази миллии тестии назди Президенти Ҷумҳурии Тоҷикистон ду нуқтаи иловагии сайёрро барои сабти довлатабони муассисаҳои таҳсилоти олии кишвар дар ноҳияҳои кӯҳистонии Айнӣ ва Тавилдара ташкил кард.

Бояд гуфт, ки Марказ бо таваҷҷуҳ ба шароити душвори навоҳии кӯҳистонӣ дар ин манотиқ нуқтаҳои сайёр ифтитоҳ кардааст, ки нуқтаҳои мазкур ҳар кадом аз ду истгоҳ иборатанд.

Ғайр аз ин, бо таваҷҷуҳ ба имкони афзоиш ва коҳиши довталабон дар маҳаллоти ҷудогона, нуқтаҳои сайёр мумкин аст дар оянда аз як маҳал ба дигар низ кӯч додашаванд.

Марҳилаи бақайдгирии довталабони муассисаҳои таҳсилоти олии Тоҷикистон аз 1 март оғоз шуда то 15 апрел идома хоҳад дошт.

Бояд қайд кард, ки то 31 марти соли ҷорӣ дар саросари Тоҷикистон беш аз 23 ҳазор нафар аз довталабон сабтином шудаанд.