Имтиҳонҳои марказонидаи дохилшавӣ мувофиқи тартиби муқарраргардида дар ду давр баргузор мегардад: асосӣ ва иловагӣ. Довталаб танҳо як маротиба имтиҳон супорида метавонад ва ба ӯ барои аз нав супоридани имтиҳони супоридааш, новобаста аз бомуваффақият ё бемуваффақият будани натиҷаи он, иҷозат дода намешавад.

Даври асосии имтиҳонҳо барои довталабоне пешбинӣ гардидааст, ки дар марҳалаи асосии бақайдгирӣ (аз 1‑уми март то 30-юми апрел) худро сабти ном мекунанд. Довталабони дар марҳалаи асосии азнавбақайдгирӣ (аз 1‑уми март то 30‑юми апрел) интихобҳои худро ивазкарда низ имтиҳонҳоро дар ҳамин давр месупоранд.

Даври асосии қисми А – имтиҳон дар заминаи таҳсилоти миёнаи умумӣ (синфи 11‑ум) ва қисми Б – имтиҳон дар заминаи таҳсилоти умумии асосӣ (синфи 9‑ум) аз 1-ум то 7-уми июл дар марказҳои имтиҳонии шаҳру ноҳияҳои интихобшудаи ҷумҳурӣ, ки ҳар довталаб яке аз онҳоро ҳангоми бақайдгирӣ интихоб мекунад ва қисмҳои В (имтиҳонҳои эҷодӣ ва маҳорати махсус) ва Г.1 (имтиҳонҳои иловагии тахассусӣ барои филиали Донишгоҳи давлатии Москва ба номи М.В. Ломоносов дар шаҳри Душанбе) аз 1‑ум то 8‑уми июл дар муассисаҳои таълимии дахлдор баргузор мегардад. Даври асосии Г.2 (имтиҳонҳои иловагии тахассусӣ барои Донишгоҳи Осиёи Марказӣ) дар шаҳрҳои Душанбе, Хуҷанд, Бохтар, Кӯлоб ва Хоруғ дар муҳлати муқарраркардаи ин донишгоҳ баргузор карда мешавад. Вобаста ба ин, дар ин бора маълумоти муфассал дар сомонаи Марказ ва донишгоҳи мазкур (https://ucentralasia.org) ҷой дода мешавад.

Даври асосии имтиҳонҳои қисми А вобаста аз ҳар гурӯҳи ихтисосҳо дар рӯзҳои алоҳида ва имтиҳонҳои қисми Б барои ҳамаи гурӯҳҳои ихтисосҳо дар як рӯз гузаронида мешавад. Дар сурати аз шумораи ҷойҳои нишасти пешбинишуда зиёд будани шумораи довталабони ягон гурӯҳи ихтисосҳо имтиҳони қисми А барои он(ҳо) 2-рӯзӣ баргузор хоҳад шуд. Нишонии маркази имтиҳонӣ дар даъватнома нишон дода мешавад.

Даври иловагии имтиҳонҳо барои довталабоне пешбинӣ шудааст, ки дар имтиҳонҳои даври асосӣ иштирок карда натавонистаанд ё интихобҳои худро дар даври дуюми азнавбақайдгирӣ (аз 10-ум то 30-юми июн) иваз кардаанд, ё худро дар марҳалаи иловагии бақайдгирӣ (аз 10‑ум то 30-юми июн) сабти ном намудаанд.

Аризаҳои довталабоне, ки дар даври асосии имтиҳонҳо иштирок карда натавонистаанду дар даври иловагии имтиҳонҳо ширкат кардан мехоҳанд, бо нишон додан ё замима кардани варақаи дорои рақами расид (квитансия) аз яке аз марказҳои хизматрасонӣ ё филиалҳои Бонки давлатии амонатгузории Ҷумҳурии Тоҷикистон “Амонатбонк” ё аз барномаи мобилии “Амонат мобайл” дар бораи пардохти маблағи иловагӣ аз 1-ум то 9-уми июл қабул карда мешавад.