Сомонаи Марказ сарчашмаи асосӣ ва воситаи осони дастрас кардани маълумоти зарурӣ дар бораи ИМД барои довталаб ва алоқамандони дигари ин имтиҳонҳо аст.
Сомонаи Марказ (нигаред ба расми 7-ум) дар шабакаи Интернет бо нишонии www.ntc.tj дастрас аст. Дар он оид ба ҳамаи масъалаҳои алоқаманд ба ИМД ва Марказ маълумоти даркорӣ ҷойгир ва мунтазам нав карда мешавад. Донистани онҳо барои довталабон ва алоқамандони ИМД муҳим аст.
Расми 7. Саҳифаи асосии сомонаи Марказ
Майдони асосии сомона барои эълону хабарҳо ва дигар матлабҳои тоза дар бораи ИМД пешбинӣ шуда, маводди он пайваста нав карда мешавад. Бахши “ИМД” дар сатри менюи сомона маълумот ва маводди ба низоми ИМД (дар соли ҷорӣ) дахлдорро дар бар мегирад. Эълонҳои тозаю муҳимро ба воситаи бахши “Эълонҳо” низ дастрас кардан мумкин аст.
Дар бахши “Ба довталаб” мавод ва маълумоти зарурӣ барои омодашавӣ ва иштироки довталаб дар ҳар марҳалаи ИМД ҷой дода шудааст. Аз ин бахш довталаб гуна (вариант)-ҳои электронии дастури иттилоотию методии “Роҳнамои довталаб”, маҷмуаҳои саволу масъалаҳои тест (намунаи тестҳо), тартибу тавсияҳои методӣ, барномаҳои имтиҳон аз фанҳои имтиҳон ва ғайраро дастрас карда метавонад. Рӯйхати муассисаҳои таълимии ба низоми ИМД дохилшуда, нақшаи қабули донишҷӯён ба муассисаҳои таълимӣ (феҳристҳои комбинатсияҳои ихтисосҳо) дар соли баргузории ИМД, рӯйхати ихтисосҳои супоридани имтиҳонҳои эҷодӣ ва маҳорати махсус талабкунандаро низ довталаб метавонад аз ин бахш пайдо намояд. Ҷавобҳои дуруст (калидҳо)-и саволу масъалаҳои тест дар давраи баргузории имтиҳонҳо ҳамарӯза пас аз анҷоми имтиҳонҳо дар ин бахши сомона ба нашр мерасанд. Ин ба довталаб имкон медиҳад, ки ӯ дар асоси нусхаи варақаи ҷавобҳояш, ки дар кабинети инфиродияш гузошта шудааст, шумораи холҳояшро аз ҳар субтести имтиҳон мустақилона ҳисоб кунад. Холҳои бадастовардаашро то нашри варақаи ҷавобҳо дар кабинети инфиродияш довталаб метавонад ҳамчунин, бо истифода аз китобчаи тест, ки баъд аз имтиҳонсупорӣ дар дасташ мемонад, мустақилона ҳисоб намояд.
Довталаб метавонад бо истифода аз бахши “Саволу ҷавобҳо” дар бораи низоми ИМД савол диҳад. Ба саволҳои пешниҳодшуда мутахассисони Марказ ҷавобҳои дақиқ ва мушаххас медиҳанд. Ба довталаб тавсия дода мешавад, ки қабл аз пурсише оид ба ИМД бо саволу ҷавобҳои пештар нашргардида шинос шавад, то ки суолҳои мавҷударо такрор накунад.
