Пас аз ҳисоби холҳои бадастовардаи довталабон аз рӯйи натиҷаи коркарди пурраи варақаҳои ҷавобҳои онҳо холҳои бадастовардаи довталабон ба балҳо баргардонида мешавад, ки ин равандро шкалабандӣ меноманд.
     Аз рӯйи натиҷаи шкалабандӣ дар доираи ҳар гурӯҳи ихтисосҳо барои ҳар субтест ҷадвали мувофиқати холҳо ба балҳо тартиб дода мешавад. Мувофиқи тартиби муқарраргардида барои ҳар субтест вобаста аз ҳар қисми имтиҳон (А ва Б) шумораи имконпазири ҳадди аксари балҳо ва ё, ба ибораи дигар, шкалаи мувофиқ муайян шудааст. Масалан, барои ихтисоси 1020505 – “Информатика” аз гурӯҳи ихтисосҳои 1-ум (табиӣ ва техникӣ) шумораи имконпазири бештарини балҳо, бо ибораи дигар, вазни субтестҳои қисми А (имтиҳон дар заминаи таҳсилоти умумӣ), чунин аст: субтести “Забони тоҷикӣ” – 75 бал, субтести “Математика” – 175 бал, субтести “Химия” – 100 бал ва субтести “Физика” – 150 бал. Дар қисми А шумораи имконпазири ҳадди аксари балҳои субтести “Забони тоҷикӣ”, новобаста аз гурӯҳҳои ихтисосҳо ва ихтисосҳо, 75 аст.
    Вобаста ба ин, агар довталаб аз субтести забони тоҷикии қисми А ба 20 хол соҳиб шуда бошад, бали бадастовардаи ӯро метавон тахминан чунин ҳисоб кард: (75 / 40) * 20 = 37,5 (бал).
    Дар ин ҷо, 75 шумораи имконпазири ҳадди аксари бали субтести забони тоҷикӣ, 40 шумораи имконпазири ҳадди аксари холи субтести мазкур ва 20 холи аз субтести мазкур бадастовардаи довталаб аст.
    Маълумоти муфассалро дар бораи шкалабандӣ аз дастури иттилоотию методии "Роҳнамои довталаб", ки гунаи электронии он рӯзҳои наздик дар сомонаи Марказ ҷой дода мешавад, дастрас кардан мумкин аст.

---

18.01.2023

    Барои номнавис кардани довталаб ҳуҷҷатҳои зерин талаб карда мешавад:
1) шиносномаи миллӣ ё маълумотнома бо муҳру сурат аз ШВКД ва нусхаи он – барои шахсоне, ки синнашон ба 16 расидааст (барои шахсони то 16-сола – шаҳодатномаи таваллуд, маълумотнома бо муҳру сурат аз ҷойи зист ва нусхаи онҳо);
2) ҳуҷҷат дар бораи таҳсилот;
3) рақами расид (квитансия)-и пардохти маблағ аз яке аз марказҳои хизматрасонӣ ё филиалҳои Бонки давлатии амонатгузории Ҷумҳурии Тоҷикистон “Амонатбонк” ё аз барномаи мобилии “Амонат мобайл”;
4) ҳуҷҷати тасдиқкунандаи имтиёзҳо (агар дошта бошад).
Маълумоти муфассалро дар бораи номгӯйи ҳуҷҷатҳои барои бақайдгирӣ зарурӣ аз дастури иттилоотию методии "Роҳнамои довталаб", ки гунаи электронии он рӯзҳои наздик дар сомонаи Марказ ҷой дода мешавад, дастрас кардан мумкин аст.

---

18.01.2023

    Барои шахсони хоҳишманди иштирок дар ИМД-2023, ки дар марҳалаи асосии бақайдгирӣ (аз 1-уми март то 30-юми апрел) худро номнавис карда наметавонанд, марҳалаи иловагии бақайдгирӣ (аз 10-ум то 30-юми июн) ба роҳ монда мешавад. Марҳалаи иловагии бақайдгирӣ соли ҷорӣ, дар баробари шаҳри Душанбе, дар шаҳру ноҳияҳои интихобшудаи дигар низ гузаронида мешавад. Маълумоти муфассал дар ин бора пеш аз оғози марҳалаи иловагии бақайдгирӣ дар сомонаи Марказ ҷой дода хоҳад шуд.

---

18.01.2023

    Бо мақсади пешакӣ номнавис намудан, довталабон аз хизматрасонии “Пешномнависӣ” (бақайдгирии пешакӣ тавассути шабакаи Интернет) истифода карда метавонанд. Аммо бояд таъкид кард, ки пешномнависӣ тавассути шабакаи Интернет ҳанӯз маънои расман ба қайд гирифтани довталабро надорад ва довталаб баъд аз пешномнависӣ барои расмӣ кардани номнависӣ ба яке аз нуқтаҳои бақайдгирӣ бояд ҳатман ҳозир шавад. Зеро, тибқи тартиби муқарраргардидаи имтиҳонҳои марказонидаи дохилшавӣ бақайдгирӣ бевосита дар ҳузури худи довталаб гузаронида мешавад, яъне аз рӯйи тартиб бақайдгирии расмии довталаб аз тариқи интернет айни замон пешбинӣ нагардидааст. Шумо маълумоти муфассалро дар ин бора аз дастури иттилоотию методии "Роҳнамои довталаб" ва сомонаи расмии Марказ аз пайванди "Пешномнависӣ" гирифта метавонед.

---

18.01.2023

    Ба Шумо тавсия медиҳем, ки дар бораи факултетҳо бевосита ба худи муассисаҳои таълимӣ муроҷиат кунед, зеро Марказ дар бораи факултетҳои муассисаҳои таълимӣ маълумот дода наметавонад. Лекин, агар манзури Шумо ихтисоси ҳуқуқшиносӣ аст, айни замон нақшаи қабули донишҷӯён барои соли таҳсили 2023-2024 ба Марказ дастрас нагардидааст. Пас аз дастрас гардидан нақшаи мазкур дар сомонаи Марказ ҷойгир карда хоҳад шуд.

---

18.01.2023